பஷில் ராஜபக்ஷவைக் கைது செய்யுமாறு CID-க்கு உத்தரவு!

கொழும்பு கோட்டை நீதவான் பசன் அமரசேன இன்று, சுற்றுலா மேம்பாட்டு பணியக நிதி முறைகேடு குற்றச்சாட்டு தொடர்பாக முன்னாள் பொருளாதார அபிவிருத்தி அமைச்சர் பஷில் ராஜபக்ஷவை கைது செய்து நீதிமன்றத்தில் முன்னிலைப்படுத்துமாறு குற்றப் புலனாய்வு திணைக்களத்தின் (CID) சட்டவிரோத சொத்துகள் விசாரணைப் பிரிவுக்கு உத்தரவிட்டார்.

இந்த வழக்கு இன்று மீண்டும் விசாரணைக்கு எடுத்துக்கொள்ளப்பட்டபோது இந்த உத்தரவு பிறப்பிக்கப்பட்டது.

விசாரணையின் போது, மூன்றாவது சந்தேகநபருக்காக ஆஜரான ஜனாதிபதி சட்டத்தரணி கலிங்க இந்ததிஸ்ஸ, தமது வாடிக்கையாளர் குற்றவியல் நடைமுறைச் சட்டத்தின் 127ஆம் பிரிவின் கீழ் இரகசிய வாக்குமூலம் ஒன்றை வழங்கத் தயாராக இருப்பதாக நீதிமன்றத்துக்கு அறிவித்தார்.

2014ஆம் ஆண்டு சுற்றுலா மேம்பாட்டு பணியகத்தின் விளம்பர நடவடிக்கைகளுக்காக ஒதுக்கப்பட்டிருந்த 7.8 மில்லியன் ரூபாய், ஊவா மாகாண சபைத் தேர்தலின்போது 12,000 டி-ஷர்ட்களை விநியோகிப்பதற்காக பயன்படுத்தப்பட்டதாகவும், இதன் மூலம் அரசுக்கு நிதி இழப்பு ஏற்பட்டதாகவும் CID அதிகாரிகள் நீதிமன்றத்தில் தெரிவித்தனர்.

மேலும், விளக்கமறியலில் வைக்கப்பட்டிருந்த சுற்றுலா மேம்பாட்டு பணியகத்தின் முன்னாள் நிர்வாக இயக்குநர் ரூமி ஜௌபர் அவர்களை தலா 10 இலட்சம் ரூபாய் பெறுமதியான இரண்டு தனிப்பட்ட பிணைகளில் விடுவிக்க நீதவான் உத்தரவிட்டதுடன், வெளிநாட்டு பயணத் தடையையும் விதித்தார்.

அத்துடன், பொதுச் சொத்துச் சட்டத்தின் கீழ் குற்றச்சாட்டுகள் தாக்கல் செய்யப்பட்டுள்ளதாக விசாரணை அதிகாரிகள் உறுதிப்படுத்தினர்.

“பி அறிக்கையில்” பெயர் குறிப்பிடப்பட்டுள்ள பணியகத்தின் நிதிப் பணிப்பாளரும் சந்தேகநபராக சேர்க்கப்படுவாரா என நீதவான் வினவியபோது, அதுகுறித்த சட்டமா அதிபரின் ஆலோசனை இன்னும் கிடைக்கவில்லை என CID தெரிவித்தது.

இந்த வழக்கு அடுத்ததாக அக்டோபர் 14ஆம் தேதி மீண்டும் விசாரணைக்கு எடுத்துக்கொள்ளப்பட உள்ளது.