மோட்டார் சைக்கிள் – டிப்பர் விபத்து குடும்பப் பெண் பலி

சாவகச்சேரி பொலிஸ் பிரிவுக்கு உட்பட்ட தனங்கிளப்பு -அறுகுவெளிப் பகுதியில் ஏ32 வீதியில் நேற்று ஞாயிற்றுக்கிழமை மதியம் 12.30 மணியளவில் இடம்பெற்ற விபத்தில் பெண் ஒருவர் சம்பவ இடத்திலேயே பலியாகியுள்ளார்.

உரும்பிராய் பகுதியைச் சேர்ந்த 47 வயதான துசாந்தி என்ற குடும்பப் பெண்ணே இவ்வாறு விபத்தில் பலியாகியுள்ளார்.

சங்குப்பிட்டிப் பகுதியில் இருந்து நாவற்குழி நோக்கி வந்த டிப்பருடன் நாவற்குழிப் பகுதியில் இருந்து மோட்டார் சைக்கிளில் வந்த பெண் மோதியதில் இவ் விபத்து சம்பவித்துள்ளது.

பெண் பயணித்த மோட்டார் சைக்கிள் சடுதியாக வீதியை விட்டு விலகி டிப்பருடன் மோதுண்டதாகத் தெரிவிக்கப்படுகிறது.

விபத்தில் இறந்த பெண்ணிற்கு ஏற்கெனவே ஒரு கால் இல்லை என்பதும் குறிப்பிடத்தக்கது.

விபத்து தொடர்பான மேலதிக விசாரணைகளை சாவகச்சேரி பொலிஸார் முன்னெடுத்து வருகின்றனர்.