காற்றில் ஆடும் மெஸ்ஸியின் 70 அடி சிலை அகற்றப்படுகிறது!
Share
இந்தியாவில் கடந்த ஆண்டு நிறுவப்பட்ட சர்வதேச கால்பந்து நட்சத்திரம் லியோனல் மெஸ்ஸியின் பிரம்மாண்டமான தங்க நிறச் சிலை, பலத்த காற்றில் ஆடிக்கொண்டிருப்பதால் அதனைப் பாதுகாப்புக் கருதி அகற்றுவதற்கு அதிகாரிகள் நடவடிக்கை எடுத்து வருகின்றனர்.
கடந்த ஆண்டு டிசம்பர் மாதம் மெஸ்ஸியின் இந்தியப் பயணத்தின் போது, அவர் உலகக் கோப்பையை ஏந்தி நிற்பது போன்ற 21 மீட்டர் (சுமார் 70 அடி) உயரமுள்ள இந்த பிரம்மாண்ட சிலை மேற்கு வங்க மாநிலம் கொல்கத்தாவில் திறந்து வைக்கப்பட்டது.
பரபரப்பான வீதியொன்றின் அருகே அமைந்துள்ள இந்தச் சிலை தற்போது பாதுகாப்பற்ற நிலையில் இருப்பதாக மேற்கு வங்க அரசின் பொறியாளர்கள் எச்சரித்துள்ளனர். இது குறித்து ஊடகங்களிடம் பேசிய மேற்கு வங்க மாநில சட்டமன்ற உறுப்பினர் சரத்வத் முகர்ஜி:
“கொல்கத்தா நகரில் உள்ள அர்ஜென்டினாவின் கால்பந்து ஜாம்பவானின் இந்தச் சிலை பாதுகாப்பற்றதாக இருப்பதாக பொறியாளர்கள் கண்டறிந்துள்ளனர். இந்தச் சிலை காற்றில் ஆடுவதை நாங்கள் கவனித்தோம். எனவே, பொதுமக்களின் பாதுகாப்பைக் கருதி, முடிந்தவரை விரைவாக இந்தச் சிலையை அகற்ற திட்டமிட்டு வருகிறோம். ஆனால், இதனை அகற்றுவது சொல்வது போல் எளிதான காரியமாக இல்லை,” என்று தெரிவித்துள்ளார்.
தற்போது, அந்தச் சிலை கீழே விழுந்துவிடாதபடி அதன் தோள் பகுதிகளில் தடித்த கயிறுகளைக் கட்டி நிலைநிறுத்தும் பணியில் தொழிலாளர்கள் தீவிரமாக ஈடுபட்டுள்ளனர். இந்தச் சிலை அகற்றப்பட்டு வேறொரு இடத்தில் மீண்டும் நிறுவப்படுமா என்பது குறித்து இன்னும் முடிவெடுக்கப்படவில்லை.
38 வயதான அர்ஜென்டினா மற்றும் இன்டர் மியாமி அணியின் நட்சத்திர வீரரான லியோனல் மெஸ்ஸி, ஜூன் 16 அன்று கன்சாஸ் நகரில் அல்ஜீரியாவுக்கு எதிராகத் தொடங்கவுள்ள உலகக் கோப்பைத் தொடரில் பங்கேற்பார் எனப் பரவலாக எதிர்பார்க்கப்படுகிறது.
அவர் இன்னும் தனது பங்களிப்பை அதிகாரப்பூர்வமாக உறுதிப்படுத்தவில்லை என்றாலும், அர்ஜென்டினா அணி கத்தாரில் வென்ற உலகக் கோப்பை சாம்பியன் பட்டத்தைத் தக்கவைத்துக் கொள்ள மெஸ்ஸியின் வருகையை ரசிகர்கள் ஆவலோடு எதிர்பார்த்துள்ளனர். இந்தத் தொடரில் அவர் விளையாடினால், அது அவரது சாதனை அளவிலான 6-வது உலகக் கோப்பைத் தொடராக அமையும்.
1.4 பில்லியன் மக்கள் தொகையைக் கொண்ட இந்தியா, கிரிக்கெட்டில் ஒரு வல்லரசாகத் திகழ்ந்தாலும், கால்பந்து தரவரிசையில் (FIFA) 142வது இடத்திலேயே உள்ளது. இருப்பினும், சமீபத்திய ஆய்வுகளின்படி இந்தியாவில் கிரிக்கெட்டுக்கு அடுத்தபடியாக மக்கள் அதிகம் விரும்பும் இரண்டாவது விளையாட்டாக கால்பந்து உருவெடுத்துள்ளது குறிப்பிடத்தக்கது.
